קריאת עליה

אהבתם? שתפו עוד אנשים.Share on FacebookTweet about this on TwitterShare on Google+

פרשת האזינו / עליית ראשון

פרק לב א הַֽאֲזִ֥ינוּ הַשָּׁמַ֖יִם וַֽאֲדַבֵּ֑רָה {ס} וְתִשְׁמַ֥ע הָאָ֖רֶץ אִמְרֵי־פִֽי׃ {ר} ב יַֽעֲרֹ֤ף כַּמָּטָר֙ לִקְחִ֔י {ס} תִּזַּ֥ל כַּטַּ֖ל אִמְרָתִ֑י {ר} כִּשְׂעִירִ֣ם עֲלֵי־דֶ֔שֶׁא {ס} וְכִרְבִיבִ֖ים עֲלֵי־עֵֽשֶׂב׃ {ר} ג כִּ֛י שֵׁ֥ם יְהוָ֖ה אֶקְרָ֑א {ס} הָב֥וּ גֹ֖דֶל לֵֽאלֹהֵֽינוּ׃ {ר} ד הַצּוּר֙ תָּמִ֣ים פָּֽעֳל֔וֹ {ס} כִּ֥י כָל־דְּרָכָ֖יו מִשְׁפָּ֑ט {ר} אֵ֤ל אֱמוּנָה֙ וְאֵ֣ין עָ֔וֶל {ס} צַדִּ֥יק וְיָשָׁ֖ר הֽוּא׃ {ר} ה שִׁחֵ֥ת ל֛וֹ לֹ֖א בָּנָ֣יו מוּמָ֑ם {ס} דּ֥וֹר עִקֵּ֖שׁ וּפְתַלְתֹּֽל׃ {ר} ו הַלְיְהוָה֙ תִּגְמְלוּ־זֹ֔את {ס} עַ֥ם נָבָ֖ל וְלֹ֣א חָכָ֑ם {ר} הֲלוֹא־הוּא֙ אָבִ֣יךָ קָּנֶ֔ךָ {ס} ה֥וּא עָֽשְׂךָ֖ וַֽיְכֹנְנֶֽךָ׃ {ר}